Zhongkun Grímsstaðir, félag kínverska auðjöfursins Huang Nubo sem falaðist eftir Grímstöðum á fjöllum árið 2011, án árangurs, er nú gjaldþrota. Þetta kemur fram í Lögbirtingarblaðinu og RÚV greinir frá, en gjaldþrotið nemur um fimm milljónum króna. Var félagið tekið til gjaldþrotaskipta undir lok apríl samkvæmt úrskurði Héraðsdóms Norðurlands eystra.
Fyrrverandi talsmaður Nubo hér á landi, Halldór Jónsson, sagði við RÚV í lok mars að félagið skuldaði áætlaða skatta sem nam þá um tveimur milljónum, en engin starfsemi hefði verið í félaginu frá árinu 2013.
Nubo hugðist reisa hótel og byggja golfvöll á Grímsstöðum en mikið fjaðrafok varð þegar ljóst var að hann hefði keypt jörðina. Var því til dæmis gert í skóna að Nubo væri útsendari kínversku ríkisstjórnarinnar og því væru kaup hans hluti af ráðagerð kommúnista um að sölsa undir sig landsvæði á Íslandi. Kaupin voru háð leyfi frá íslenskum stjórnvöldum, en það leyfi fékkst aldrei, en þáverandi innanríkisráðherra, Ögmundur Jónason barðist hart gegn málinu, þvert á vilja samstarfsflokksins, Samfylkingarinnar. Þar sem Nubo var ekki íslenskur ríkisborgari né íbúi innan Evrópska efnahagssvæðisins, fékk hann aldrei undanþáguna sem hann sóttist eftir.
Árið 2016 keypti hinsvegar breski milljarðamæringurinn Jim Ratcliffe meirihlutann í jörðinni Grímsstöðum á Fjöllum, svo vernda mætti laxveiðiár á Norðausturlandi, að eigin sögn.