Guðmundur Andri Thorsson, rithöfundur og þingmaður Samfylkingarinnar, gagnrýnir harðlega Mike Pence, varaforseta Bandaríkjanna, og væntanlega heimsókn hans til Íslands. Segir hann Pence vera öfgamann sem beiti sér gegn réttindum kvenna og hinseginfólks. Þetta kemur fram í pistli Guðmundar á Facebook þar sem hann segir:
„Mike Pence er kristinn öfgamaður. Hann hefur beitt sér gegn réttindum kvenna og verið opinskár í andúð sinni á hinsegin fólki, aðhyllist mismunun á grundvelli trúar og kynhneigðar og hefur gert sitt til að kynda undir því hatri sem orðið er að meiriháttar samfélagsmeini í Bandaríkjunum og víðar. Það er ekki sjálfsagt mál að slíku jaðarmenni sé tekið opnum örmum þegar hann kemur hingað, þó að auðvitað þurfi að sýna embætti hans vissa kurteisi.“
Guðmundur segir síðan að Pence og Guðlaugur Þór utanríkisráðherra séu tvísaga um tilgang heimsóknarinnar en engu líkara sé en ríkisstjórnin sé að leyna því að verið sé að efla varnarsamstarfið við Bandaríkjamenn:
„Afar óheppilegt er að Bandaríkjamenn og utanríkisráðherra íslensku ríkisstjórnarinnar skuli vera tvísaga um tilgang ferðarinnar og það sem stendur til að ræða. Bandaríkjamenn segjast ætla að ræða hernaðarmál en Guðlaugur Þór nefndi aðeins efnahagmál. Það er kannski feimnismál í ríkisstjórn undir forystu flokks sem segist andvígur varnarsamstarfi vestrænna þjóða en við þurfum nú samt að fá að vita af því ef ameríski herinn er að snúa hingað aftur undir stjórn slíkra manna sem Pence og Trumps.“