Í síðustu sveitarstjórnarkosningum nýttu aðeins 15,3% íbúa utan Norðurlanda sem hafa kosningarétt hér á landi þann rétt sinn. Á meðan var þátttökuhlutfall fólks frá Norðurlöndum sem hefur kosningarétt hér á landi rúmlega 50% og kosningaþátttaka í heild var tæp 70%. Þetta kemur fram í leiðara Fréttablaðsins sem ritstjórinn Davíð Stefánsson ritar.
Norðurlandabúar sem hafa átt lögheimili hér á landi í þrjú ár hafa kosningarétt. Íbúar utan Norðurlandanna öðlast þennan rétt eftir að hafa haft lögheimili hér á landi í fimm ár. Davíð hefur miklar áhyggjur af kosningaþátttöku þessa hóps:
„Mögulegar ástæður fyrir þessari litlu þátttöku gætu verið tungumálaörðugleikar, skortur á upplýsingum eða efasemdir sem eiga rætur í upplifun kosninga í heimalandinu vegna spillingar eða annarra þátta.
Efalítið segja einhverjir að lítil þátttaka sé eðlileg því menn ætli að staldra stutt við. En fimm ár eða meira eru talsverð dvöl. Margt þessa fólks hefur dvalið langdvölum hér án þess að nýta kosningaréttinn.
Þessi litla kosningaþátttaka er vondar fréttir fyrir lýðræðislegt samfélag. Það að einungis 15,3 prósent erlendra ríkisborgara kjósi er óæskilegt.“
Davíð segir að virkja þurfi stístækkandi hóp innflytjenda í íslensku samfélagi betur. Hvetur hann ráðamenn sveitarfélaga til að huga að þessu vandamáli og stuðla að aukinni þátttöku innflytjenda í næstu sveitarstjórnarkosningum sem verða vorið 2022.