Svandís Svavarsdóttir heilbrigðisráðherra hefur skipað starfsfóp til að meta hvort setja þurfi frekari leiðbeiningar um hvernig þvingunarúrræðum gegn einstaklingum er beitt. Hér er til dæmis um að ræða tilvik þegar fólk er svipt sjálfræði eða nauðungarvistað á sjúkrahúsi, og um þvingaða lyfjagjöf, svo dæmi séu tekin.
Í fréttatilkynningu um þetta á vef stjórnarráðsins segir meðal annars:
„Svandís Svavarsdóttir heilbrigðisráðherra hefur skipað starfshóp til að meta hvort þörf sé á að setja frekari leiðbeiningar um útfærslu á þvingunarúrræðum en felast í lögræðislögum varðandi meðferð einstaklinga sem eru nauðungarvistaðir á sjúkrahúsi.
Í 28. gr. lögræðislaga er fjallað um meðferð nauðungarvistaðs einstaklings á sjúkrahúsi. Greininni fylgir ákvæði um að heilbrigðisráðherra geti sett nánari reglur um þvingaða lyfjagjöf og aðra meðferð sem greinin tekur til.“
Starfshópurinn á að kanna hvort þörf sé á frekari leiðbeiningum en þeim sem lesa má úr lögum um þessi efni, og gera þá tillögur að formi og efnisákvæðum slíkra leiðbeininga. Starfshópurinn skal skila ráðherra skýrslu um málið eigi síðar en 15. nóvember næstkomandi.