Icelandair hefur tapað 11 milljörðum króna það sem af er ári. Talið er að tapið gæti farið yfir 17 milljarða á þessu ári. Félagið varð fyrir miklu höggi vegna MAX-vélanna en Bogi Nils Bogason, forstjóri Icelandair, segir félagið stefna á að fá allt tjón vegna flugvélanna bætt frá framleiðanda. Þetta kemur fram hjá Vísi.
Kyrrsetning MAX-vélanna var mikið áfall, en Bogi segir að að öðru leyti hafi reksturinn gengið vonum framar. „Það eru því bæði góð tíðindi í uppgjörinu og svo áhrif MAX-vélanna sem eru vonbrigði og í raun áfall.“
Hann segir að tjón vegna kyrrsetningarinnar hafi numið 6 milljörðum á öðrum ársfjórðungi 2019. „og muneira þegar við lítum á árið í heild.“
Framleiðandi vélanna, Boeing, gerir ráð fyrir háum bótagreiðslum til viðskiptavina vegna málsins. Bogi segir Icelandair vongott um að fá tjón sitt bætt. „Okkar markmið er skýrt- Það er að fá allt tjón bætt“
Þrátt fyrir mikið tap segir Bogi þó engar stórar uppsagnir á teikniborðinu. Félagið hafi fjölgað farþegum á milli ára og þrátt fyrir að hlutabréf Icelandair hafi lækkað mikið í morgun eftir að ársfjórðungsuppgjörið var birt þá sé það eðli fyrirtækja í flugrekstri að hlutabréfagengi sé sveiflukennt.
Bogi útilokar þó ekki að fargjöld í vetur verði hærri heldur en síðastliðinn vetur.