Borgarstjórn hefur lýst því yfir að hún styðji að fjöldatakmörkunum á leigubílum verði aflétt en samkvæmt drögum að nýju frumvarpi um leigubifreiðar verða fjöldatakmarkanir á leyfum til leiguaksturs afnumdar. Talið er að þær samræmist ekki EES-samningnum. Hvað varðar starfsemi fyrirtækis á borð við Uber þarf að stíga varlega til jarðar að mati Sigurborgar Óskar Haraldsdóttur formanns skipulags- og samgönguráðs Reykjavíkur.

Fréttablaðið skýrir frá þessu í dag. Þar er haft eftir Sigurborgu að málið sé svolítið snúið. Hún segist óttast ef fyrirtæki á borð við Uber hefji starfsemi í Reykjavík muni það leiða til meiri umferðar.

„Það er mjög gott að fá betri nýtingu á hverju farartæki fyrir sig en það er hins vegar ekki gott fyrir borgina og sveitarfélögin á höfuðborgarsvæðinu ef umferðin er að fara að aukast vegna tilkomu þessara fyrirtækja. Það hefur sýnt sig að það hefur gerst í öðrum borgum.“

Fyrir borgina snúist þetta um að minnka umferð svo hægt verði að ná markmiðum Parísarsamkomulagsins um minni útblástur. Einnig komi landnotkun þarna inn í því það sé hagkvæmt að hafa færri bílastæði og þar með ná betri nýtingu á plássi í borginni. Uber geti komið að gagni við að ná þessum markmiðum en geti einnig aukið umferð er haft eftir Sigurborgu.