Vísitala neysluverðs, miðuð við verðlag í júlí 2019, er 468,8 stig (maí 1988=100) og lækkar um 0,21% frá fyrri mánuði. Vísitala neysluverðs án húsnæðis er 400,0 stig og lækkar um 0,42% frá júní 2019.
Sumarútsölur hafa víða verið í gangi og lækkaði verð á fötum og skóm um 11,2% (áhrif á vísitöluna -0,49%). Verð á húsgögnum lækkaði um 9,2% (-0,12%). Verð á flugfargjöldum til útlanda hækkaði um 6,3% frá fyrri mánuði (0,10%). Verð á hótelum og veitingastöðum hækkaði um 1,9% (0,11%).
Síðastliðna tólf mánuði hefur vísitala neysluverðs hækkað um 3,1% en vísitalan án húsnæðis hefur hækkað um 2,8%.
Vísitala neysluverðs samkvæmt útreikningi í júlí 2019, sem er 468,8 stig, gildir til verðtryggingar í september 2019. Vísitala fyrir eldri fjárskuldbindingar, sem breytast eftir lánskjaravísitölu, er 9.256 stig fyrir september 2019.
