Styrmir Gunnarsson, fyrrverandi ritstjóri Morgunblaðsins, segir tímabært að greiða atkvæði á meðal flokksbundinna Sjálfstæðismanna um hvort flokkurinn eigi að styðja frumvarp um Orkupakka 3. Styrmir segir þetta á bloggsíðu sinni og vitnar í skipulagsreglur flokksins:
„Í 6. grein skipulagsreglna Sjálfstæðisflokksins segir m.a.:
„…Miðstjórn er skylt að láta fara fram almenna kosningu meðal flokksmanna um tiltekin málefni berist skrifleg ósk um það frá a.m.k. 5000 flokksbundnum félagsmönnum og af þeim skulu ekki færri en 300 flokksmenn koma úr hverju kjördæmi landsins.“
Þessar reglur eru skýrar. Þeim er ekki hægt að stinga undir stól.“
Umræður um orkupakkann eiga að hefjast að nýju í ágúst en málinu var frestað fyrir síðustu þinglok. Styrmir vill að næstu vikur verði notaðar til að safna 5000 undirskriftum og knýja þannig fram atkvæðagreiðslu:
„Það blasir við að andstæðingar orkupakka 3 innanSjálfstæðisflokksins noti næstu vikur til að safna þessum fjölda undirskrifta og knýi með því fram atkvæðagreiðslu meðal allra flokksbundinna meðlima um málið.
Sjálfstæðisflokkurinn er lýðræðislegur stjórnmálaflokkur.“