„Ég útiloka ekki að þetta geti verið góð leið,“ sagði Katrín Jakobsdóttir forsætisráðherra í útvarpsþættinum Sprengisandur er hún var spurð um möguleikann á því að setja ákvörðun um lagningu sæstrengs í þjóðaratkvæðagreiðslu. Hugmyndir eru uppi um slíkt á meðal sumra þingmanna Sjálfstæðisflokksins og tengist umræðan ágreiningi í flokknum um samþykkt þriðja orkupakkans.
„Ég hef talað fyrir því að við séum með skýran ramma um þjóðaratkvæðagreiðslur og ég er ekki með oftrú á þjóðaratkvæðagreiðslum sem tækinu sem leysir allt þegar við viljum efla lýðræði í landinu, þá er ég ekki endilega þeirrar skoðunar að þjóðaratkvæðagreiðslur séu alltaf rétta leiðin. Ég vil miklu frekar horfa til aðferða sem snúast um að almenningur geti haft áhrif á ákvarðanir á fyrri stigum.“
Haraldur Benediktsson, þingmaður Sjálfstæðisflokksins, hefur varpað þeirri hugmynd fram opinberlega að lagning sæstrengs fari í þjóðaratkvæði. Þess má geta að samþykkt Orkupakka 3 felur ekki sjálfkrafa í sér skyldu til að leggja sæstreng heldur er slík ákvörðun í höndum Alþingis.