Í Bretlandi er talað um „the silly season“ í fjölmiðlum. Þetta er tíminn þegar lítið er að frétta og blaðamenn þurfa að stunda alls konar tilbúning – seilast langt eftir fréttum til að fylla fjölmiðla sína.
Á Íslandi hefur þetta verið kallað „gúrkutíð“. Þetta mun vera komið frá Þýskalandi, með viðkomu í Danmörku, „Sauergurkenzeit“ heitir það á þýsku, en í sænsku er talað um fréttaþurrk, „nyhetstorka“.
Við höfum upplifað talsvert af þessu hér á Íslandi á þessu góðviðrissumri. Þar á meðal sýnist manni vera fréttir um að Bjarni Benediktsson, formaður Sjálfstæðisflokksins, ætli að segja af sér í haust og láta Þórdísi Kolbrúnu Reykfjörð Gylfadóttur taka við af sér.
Fyrir þessu virðist ekki vera neinn flugufótur. Þetta eru bara vangaveltur, engra heimilda er getið – kannski er þessu dreift sem lið í innanflokksátökum? En svo eru menn farnir að tala eins og þetta sé alveg að fara að gerast – og nota þá tækifærið til að gera lítið úr Þórdísi Kolbrúnu, líkt og virðist vera lenska hjá vissum hópi Sjálfstæðismanna þessa dagana.