Helgi Hrafn Gunnarsson, þingmaður Pírata, greiddi atkvæði gegn setu Birgittu Jónsdóttur í trúnaðarráði Pírata. Í viðtali við Morgunblaðið segir Helgi Hrafn að Birgitta njóti ekki almenns trausts innan flokksins og meðal annars þess vegna hafi hann tekið afstöðu gegn setu hennar í trúnaðarráðinu. Enginn þingmaður Pírata studdi setu Birgittu í ráðinu.
Eins og við greindum frá seint í gærkvöld var tillaga um að Birgitta tæki sæti í trúnaðarráði felld með miklum meirihluta. Ásakanir hafa gengið um smölun á fundinn sem átti raunar upphaflega ekki að halda fyrr en í ágúst, samkvæmt heimildum DV, en fór óvænt fram í gærkvöld.
Birgitta er einn stofnenda Pírata og hefur setið á þingi fyrir flokkinn. Hún ákvað síðan að hætta afskiptum af stjórnmálum fyrir nokkrum misserum. Í vor lýsti hún hins vegar yfir áhuga fyrir að ganga aftur til liðs við hreyfinguna.