Jón Gnarr, grínisti og fyrrverandi borgarstjóri í Reykjavík, er ekki hrifinn af Ingólfstorginu, sem áður nefndist Hallærisplanið, Steindórsplanið og Hótel – Íslandsplanið.
Á Twitter segir Jón að torgið ætti góðan möguleika á að vinna til verðlauna í mörgum flokkum, ef efnt væri til alþjóðlegrar samkeppni:
„ef það væri efnt til alþjóðlegrar samkeppni um ljótasta miðbæjartorgið þá ætti Ingólfstorg góðan séns að vinna til verðlauna, jafnvel í mörgum flokkum“
Torgið er notað fyrir ýmiskonar uppákomur og er vinsælt meðal hjólabrettafólks og gegnir stóru hlutverki þegar blásið er til ræðuhalda eða atriða í tilefni hátíðardaga á borð við verkalýðsdaginn 1. maí, þjóðhátíðardaginn 17. júní og Menningarnótt.
Torgið er nefnt í höfuðið á Ingólfi Arnarsyni landnámsmanni, en var opnað formlega árið 1993 eftir endurskipulagningu miðborgarinnar. Sagði þáverandi borgarstjóri, Markús Örn Antonsson, að torgið væri samkomustaður borgarbúa á öllum aldri, og það væri byggt „hundruð ára fram í tímann.“
Jón Gnarr var borgarstjóri Reykjavíkur frá 2010 til 2014, en Eyjunni rekur ekki minni til þess að Jón hafi lagt til breytingar á Ingólfstorgi í sinni stjórnartíð.
Hinsvegar stendur nú yfir mikil endurskipulagning á þremur torgum í Reykjavík undir nafninu „Þingholt, torgin þrjú“, þar sem um 300 milljónum er varið til þess að gera upp Baldurstorg, Freyjutorg, og Óðinstorg.
Hér að neðan má sjá myndir frá því hvernig Ingólfstorgið leit út á árum áður, samanborið við hvernig það lítur út í dag:
ef það væri efnt til alþjóðlegrar samkeppni um ljótasta miðbæjartorgið þá ætti Ingólfstorg góðan séns að vinna til verðlauna, jafnvel í mörgum flokkum
— Jon Gnarr (@Jon_Gnarr) July 14, 2019