Landsbankinn spáir því að verðbólga lækki um 0,1% á milli mánaða, en Hagstofan birtir júlívísitölu neysluverðs eftir rúma viku. Gangi spá Landsbankans eftir lækkar ársverðbólga úr 3,3% í 3,2%.
Bankinn telur að sumarútsölur á fötum og skóm, húsgögnum og heimilisbúnaði, verði svipaðar og seinustu ár og áhrifin á vísitöluna verði jákvæð. Hins vegar hækkuðu flugfargjöld meira en búist var við í júní og reiknar bankinn með að hækkunin í júlí verði ögn meiri en undanfarin ár.
Landsbankinn bendir á að ýmislegt bendi til þess að verðbólgan sé orðin almennari hér á landi og að undirliggjandi verðbólguþrýstingur sé að aukast.
Eftir að hafa veikst jafnt og þétt síðan í apríl hefur gengi krónunnar verið mjög stöðugt gagnvart evru síðasta mánuðinn. Bent er á að nær engin viðskipti hafi verið á millibankamarkaði með gjaldeyri síðustu 30 dagana. Þetta geti þýtt óskilvirkari verðmyndun og meiri sveiflur á gengi krónunnar.