Fasteignagjöld hafa hækkað mikið undanfarin sex ár og í sumum tilvikum hafa þau meira en tvöfaldast. Þetta kemur fram á vef ASÍ.
Verðlagseftirlit ASÍ tók saman þróun fasteignagjalda á íbúðarhúsnæði í stærstu sveitarfélögum landsins undanfarin sex ár.
Fasteignamat, í sumum tilvikum lóðamat, er einn af gjaldstofnum fyrir innheimtu fasteignagjalda. Með fasteignamati geta sveitarfélögin minnkað áhrif hækkana á fasteigna- og lóðamati með því að lækka álagningarhlutföll.
„Einhver sveitarfélög hafa lækkað álagningarhlutföll til að stemma stigi við hækkun á fasteignamati en slíkar mótvægisaðgerðir hafa ekki alltaf verið nægilega miklar til að draga úr hækkunum fasteignagjalda. Þá hafa ekki öll sveitarfélög lækkað álagningarhlutfall sitt og í einhverjum tilfellum hefur það hækkað.“
Verðlagseftirlitið tekur dæmi um fasteignaskatt á fjölbýli í Keflavík. En þar hefur mesta hækkunin átt sér stað, eða um 136 prósent.
„Á tímabilinu 2013-2019 lækkaði álagningarhlutfall hjá 10 af 15 sveitarfélögum á tímabilinu, stóð í stað hjá þremur sveitarfélögum og hækkaði hjá tveimur sveitarfélögum. Þrátt fyrir það hefur innheimtur fasteignaskattur í flestum tilfellum hækkað mikið síðan árið 2014.“
Úttekt Verðlagseftirlitsins sýndi líka fram á að sorphirðugjöld hafi hækkað mikið, fráveitugjöld, lóðarleiga og vatnsgjöld.
