Samkvæmt heimildum DV er þrýst mjög á að Áslaug Arna Sigurbjörnsdóttir ritari Sjálfstæðisflokksins verði næsti dómsmálaráðherra. Þórdís Kolbrún Reykfjörð Gylfadóttir hefur gengt embættinu frá því Sigríður Andersen dró sig í hlé. Heimildarmenn DV segja að stuðningsmenn Áslaugar gangi ekki síst hart fram í þessu máli. Jafnvel hafi staðið til að skipa Áslaugu í embættið strax í vor, en þá hafi Bjarni Benediktsson formaður flokksins ákveðið að bíða aðeins vegna andstöðu marga í Sjálfstæðisflokknum. Áslaug mun meðal annars hafa vísað til kynjasjónarmiða í ríkisstjórn sem rök fyrir því að hún ætti að fá embættið.

Fleiri í þingflokki Sjálfstæðisflokksins hafa hins vegar líka áhuga á embætti dómsmálaráðherra. Þannig vill Sigríður Andersen gjarnan snúa til baka, auk þess sem Brynjar Níelsson er áhugasamur. Óvíst er með áhuga Birgis Ármannssonar.

Ekki er útilokað að fleiri ráðherrahrókerningar verði hjá Sjálfstæðisflokknum í haust. Þannig munu bæði Páll Magnússon og Jón Gunnarsson hafa mikinn áhuga á að fá að spreyta sig, þó ekki í embætti dómsmálaráðherra.