Gunnar Smári Egilsson, stofnandi Sósíalistaflokks Íslands, segir að meðan kjarasamningar stóðu sem hæst hafi fyrrverandi forystumaður í Samfylkingunni sagt að það væri meiri lífskjarabót fyrir láglaunafólk að fá góða gönguskó og hvatningu til að ganga á fjöll en að fá 20 til 30 þúsund króna launahækkun.

Þetta segir hann í færslu á Facebook þar sem hann gagnrýnir andlegu hlið einstaklingshyggju. „Einstaklingshyggja nýfrjálshyggjuáranna skapaði andlega hlið, hugmyndina um að við ættum að byggja okkur upp andlega hvert fyrir sig til að þola óréttlæti kapítalismans í stað þess að sameinast til að umbreyta samfélaginu og berjast gegn óréttlæti þess og ójöfnuði. Ég hef auðvitað ekkert á móti því að fólk noti núvitund, jóga eða aðra líkams- eða hugrækt, ekki frekar en höfundur þessarar greinar; en það er ekki tilviljun að bæði stórfyrirtæki, bandaríski herinn og sjálfumglaða elítan á Davos taki núvitund opnum örmum,“ segir Gunnar Smári.

Hann segir að við þessi skrif hafi rifjast upp fyrrnefnd ummæli Samfylkingarmannsins. „Meðan ég var að skrifa þennan stutta texta rifjaðist upp fyrir að fyrrum forystumaður í Samfylkingunni trúði mér fyrir því meðan kjarasamningar stóðu sem hæst að það væri meiri lífskjarabót fyrir láglaunafólk að fá góða gönguskó og hvatningu til að ganga á fjöll en að fá 20-30 þús. kr. launahækkun; svona getur andleg trúarbrögð nýfrjálshyggjunnar leikið samfélagsskilning vel meinandi fólks; það heldur að lausnin á óréttlæti heimsins sé innra mein þeirra sem verða undir óréttlæti kapítalismans. Reyndar fékk láglaunafólkið ekki svona mikla launahækkun, og ekki einu sinni nægjanlega til að kaupa sér sæmilega götuskó, en það er önnur saga og ekki síður sorgleg,“ skrifar Gunnar Smári og deilir hlaðvarpi Guardian um andlegu hlið einstaklingshyggju.