Þórdís Kolbrún Reykfjörð Gylfadóttir, varaformaður Sjálfstæðisflokksins, viðurkennir að nokkur kurr sé í flokknum en segir að ávallt hafi verið átök í Sjálfstæðisflokknum og það sé styrkur hans. Þetta kom fram í útvarpsþættinum Sprengisandi á Bylgjunni í morgun og Vísir.is greinir frá.

Forysta flokksins hefur verið gagnrýnd harðlega undanfarið, ekki síst á síðum Morgunblaðsins, þar sem fyrrverandi formaður flokksins Davíð Oddsson er ritstjóri. Talið er að mikil óánægja sé með frumvarpið um Orkupakka III en einnig sykurskatt og fleiri mál.

Þórdís sagði:

„Sjálfstæðisflokkurinn er breiðfylking og hefur verið kjölfesta í íslenskum stjórnmálum frá stofnun, ég fjallaði um það á landsfundi að það er áskorun fyrir Sjálfstæðisflokkinn að starfa í umhverfi þar sem ekki eru fjórir flokkar heldur átta. Þar sem við höldum áfram að reyna að ná til kjósenda á okkar forsendum en ekki forsendum smáflokka.“

Hún var þá spurð hvort flokkurinn gæti lengur rúmað ólíkar skoðanir þegar menn væru farnir að hnakkrífast opinberlega. Þórdís svaraði:

„Grasrót Sjálfstæðisflokksins er mjög þétt út um allt land, meirihluti hennar er ekki að hnakkrífast. Það er það fólk sem við sækjum okkar stuðning og styrk til. Það er enginn flokkur sem nýtur í sama mæli slíkrar grasrótar“