Gunnar Bragi Sveinsson, þingmaður Miðflokksins, fer hörðum orðum um Viðreisn í aðsendri grein í Morgunblaðinu í dag. Gunnar Bragi uppnefnir flokkinn og kallar hann „litlu Samfylkinguna“. Segir hann flokkinn standa gegn lýðheilsu með afstöðu sinni í nokkrum málaflokknum. Kemur fram í greininni að Gunnar Bragi virðist mjög andsnúinn auknu frelsi í verslun með áfengi:
„Þetta hefur verið sérstaklega áberandi þegar kemur að varnaðarorðum gegn aukinni áfengisneyslu sem fylgir svokölluðu brennivínsfrumvarpi þeirra“
Gunnar Bragi átelur Viðreisn einnig fyrir að leggjast gegn sykurskatti og vera fylgjandi óheftum innflutningi á ferskum matvælum. Enn fremur segir í greininni:
„Fjórtán tillögur Embættis landlæknis hafa fengið falleinkunn flokksins þrátt fyrir að sumar þeirra væru til þess fallnar að stuðla að aukinni lýðheilsu. Tillögur svo sem að upplýsa neytendur betur, þótt ekki sjái undirritaður ástæðu til að fara eftir tillögum eins og að hækka skatta umfram það sem nú nú er.“
Gunnar Bragi veltir upp þeirri tilgátu að Viðreisn taki hugsanlega ekki mark á Landlækni vegna þess að hann er ekki á vegum þeirra samtaka sem Viðreisn metur mest:
„Hugsanlega er það svo að í huga Viðreisnar eru sérfræðingar ekki sérfræðingar nema þeir starfi innan Evrópusambandsins eða séu á snærum Félags atvinnurekenda.“
Varðandi innflutning á matvælum bendir Gunnar Bragi á að fræðimenn spái því að sýklalyfjaónæmi eitt og sér verði stærri valdur að dauða en krabbamein eftir um þrjátíu ár. Hann sér jafnframt hvarvetna mótsagnir og hræsni í málflutningi Viðreisnar, eins og þetta dæmi ber vitni um:
„Til dæmis má nefna þegar einn núverandi þingmaður og þáverandi ráðherra Viðreisnar óskar foreldrasamtökum gegn áfengisauglýsingum velfarnaðar í mikilvægum verkefnum einn daginn en er vart kominn úr ráðherraembættinu næsta dag þegar hann leggur fram brennivínsfrumvarp sem vinnur gegn verkefnum samtakanna.“