Össur Skarphéðinsson, fyrrverandi formaður Samfylkingarinnar og fyrrverandi utanríkisráðherra, segir að Davíð Oddssyni, fyrrverandi forsætisráðherra, fyrrverandi Seðlabankastjóra og núverandi ritstjóra Morgunblaðsins, hafi tekist það sem vinstri flokkum hafi aldrei tekist, þrátt fyrir hatrammar tilraunir í áratugi: Að kljúfa Sjálfstæðisflokkinn.

Það hefur ekki farið framhjá neinum sem fylgist með stjórnmálum og þjóðfélagsumræðu hér á landi að það hefur andað köldu á milli Davíðs og núverandi forystu Sjálfstæðisflokksins. Hefur Morgunblaðið, og þá gjarnan þegar Davíð beitir sínum penna, hæðst að formanni flokksins og nokkrum forystumönnum og ráðherrum hans. Morgunblaðið virðist mjög andsnúið Orkupakka 3 sem Sjálfstæðisflokkurinn er að reyna að keyra í gegnum Alþingi ásamt samstarfsflokkum í ríkisstjórn. Össur telur að Davíð sé að leiða Sjálfstæðisflokksinn inn í tíma hjaðningavíga og áhrifaleysis. Hann skrifar um þetta:

Davíð Oddssyni er að takast það sem vinstri mönnum tókst aldrei – að rífa sundur Sjálfstæðisflokkinn. Allt bendir til að ritstjóra Moggans sé að takast að leiða flokkinn inn í skeið hjaðningavíga og langvarandi áhrifaleysis í stjórnarandstöðu. Allt er það í boði sægreifanna sem eiga Moggann og borga bæði tapið af honum og laun Davíðs. Hann er langáhrifamesti stjórnarandstæðingurinn í dag og fyrir vinstri vænginn ígildi vel þjálfaðrar fimmtu herdeildar….