Eins og fram hefur komið í fréttum að undanförnu eru ekki allir sáttir innan Sjálfstæðisflokksins og virðist ákveðinn óánægja og pirringur krauma undir. Fréttablaðið skýrir frá því í dag að mikils pirrings gæti í grasrót flokksins og sé helsta ástæðan vinstrislagsíða ríkisstjórnarinnar. Minna fari fyrir áhyggjum af þriðja orkupakkanum og af gagnrýni fyrrum forystumanna flokksins. Þá er formaður flokksins sagður vera orðinn of mikill embættismaður og það vanti alla pólitík í hann nú orðið.

Fréttablaðið segir að vinstrislagsíða ríkisstjórnarinnar sé helsti uppruni pirrings innan Sjálfstæðisflokksins. Viðmælendur blaðsins nefndu þar til sögunnar áherslu á skattlagningu, sektarheimild til Jafréttisstofu og bann við sölu ríkisfyrirtækja. Þá var nefnt til sögunnar að áhersla forystu flokksins á að höfða til fylgis Viðreisnar pirri fólk því þessi áhersla sé á kostnað stefnumála Sjálfstæðisflokksins.

Bjarni Benediktsson, formaður, er sagður njóta almenns stuðnings innan flokksins en margir séu þó óánægðir með að hann sé að breytast í embættismann og nú vanti alla pólitík í hann.

Ágreiningurinn um þriðja orkupakkan er sagður að mestu bundinn við hverfafélögin í Reykjavík. Þau félög hafa lengi verið sterkasta vígi Guðlaugs Þórs Þórðarsonar, utanríkisráðherra, og er fólki tíðrætt um óánægju meðal stuðningsmanna hans að sögn Fréttablaðsins.