„Elliðaárdalurinn er einstök náttúruperla í höfuðborginni okkar, höfuðborg allra landsmanna. Nú berast fregnir af því að meirihluti borgarstjórnar, sem gefur sig út á tyllidögum fyrir að setja umhverfismálin á oddinn, sé búinn að heimila uppbyggingu gríðarstórra mannvirkja í Elliðaárdalnum,“ segir Björn Gíslason, borgarfulltrúi Sjálfstæðisflokksins í grein í Morgunblaðinu í morgun. Ný tillaga að deiliskipulagi á svæðinu sem samþykkt hefur verið í skipulags- og samgönguráði borgarinnar gerir ráð fyrir mikilli uppbyggingu á Stekkjarbakka. Eru í tillögunni skilgreindir byggingarreitir fyrir samtals 43 þúsund fermetra.

Í frétt um málið í Morgunblaðinu segir Eyþór Arnalds, oddviti Sjálfstæðisflokksins í borgarstjórn, að keyra eigi nýja deiluskipulagið áfram í skjóli sumarfrís borgarstjórnar. Samkvæmt tillögunni er gert ráð fyrir 18.000 fermetra verslunarrými á svæðinu, sem er í jaðri Elliðaárdals. Einnig á að reisa 4.500 fermetra gróðurhús og viðlíka stórt bílastæði.

Björn Gíslason skrifar enn fremur:

„Fulltrúar Sjálfstæðisflokksins í ráðinu lögðust gegn þessari tillögu, enda leggja allir fulltrúar Sjálfstæðisflokksins í borgarstjórn Reykjavíkur ríka áherslu á
verndun grænna svæða í borgarlandinu og leggjast gegn hvers kyns húsnæðisuppbyggingu sem gengið gæti nærri slíkum svæðum.“

Tillaga meirihlutans að deiluskipulaginu verður lögð fyrir borgarráð í dag. Hvetur Björn í grein sinni Líf Magneudóttur, oddvita VG, til að leggjast gegn tillögunni í ljósi áherslna VG á umhverfismál.