Þorgerður Katrín Gunnarsdóttir, formaður Viðreisnar, segir sykurskattinn sem er hluti af aðgerðaráætlun Svandísar Svavarsdóttur og Landlæknisembættisins, fela í sér mismunun, þar sem honum sé aðeins beint að sumum fyrirtækjum sem noti mikið magn af sykri í sínum vörum, meðan önnur sleppi.
Aðspurð hvort eitthvað annað en lýðheilsusjónarmið sé forsenda tillögurnar, nefnir hún að það veki furðu að gos og sælgæti sé tekið út fyrir sviga, en samkvæmt tillögunum er ekki fyrirhugað að hækka skatt á kökum, kexi, ís eða mjólkurvörum:
„Uppleggið vekur furðu. Ef það er hægt að treysta einhverju hjá þessari ríkisstjórn þá er það að slá skjaldborg um sérhagsmuni Mjólkursamsölunnar,“
segir Þorgerður við Fréttablaðið og telur fyrirtækjum mismunað:
„Þessi mismunun á vörutegundum er mjög sérstök. Á meðan eitt fyrirtæki uppi á Höfða sem framleiðir gosdrykki er skattlagt í botn þá er annað fyrirtæki í 100 metra fjarlægð, stór aðili í sykurinnflutningi, sem sleppur alveg við þetta, það er Mjólkursamsalan,“
segir Þorgerður.
Samkvæmt Sunnu Marteinsdóttur, verkefnastjóra í upplýsinga- og fræðslumálum hjá MS, er fyrirtækið ekki stórtækt í sykurinnflutningi:
„Mjólkursamsalan hefur markvisst unnið að því að minnka sykur í sínum vörum frá árinu 2003 og í dag eru um 85% af öllum okkar vörum án viðbætts sykurs. MS kaupir árlega um 1-2% af heildarsykurinnflutningi í sína framleiðslu en stærstu aðilarnir í kaupum á sykri eru um 10 sinnum stærri en MS.“
Samkvæmt Dóru Guðrúnu Guðmundsdóttur, sviðsstjóra hjá Embætti landlæknis og eins höfunda aðgerðaráætlunarinnar, sýna rannsóknir að skattlagning breyti hegðun, sem sé markmiðið, því tekjulágir hafi minni menntun og lifi óheilbrigðara lífi og lifi því skemur.
Þorgerður Katrín er ósammála:
„Ég er ekki sannfærð um að þessi útfærsla á skattlagningu geti breytt hegðun. Upplýsum neytandann í staðinn fyrir að skattleggja hann.“