Vera hers á Íslandi og aðild að Nató hefur ekki verið frágangsmál á Íslandi síðan á árunum eftir 1970. Þá sat vinstri stjórn sem nötraði um tíma vegna hers og Nató. Þá voru leiðtogar stórveldanna Nixon og Brésnev. En samt var það nú svo að stjórnin sprakk ekki vegna þeirra mála. Síðan hafa setið vinstri stjórnir, nú síðast hreinræktaðasta vinstri stjórn sögunnar þegar VG og Samfylkingin stjórnuðu saman, og þær hafa ekki hróflað við varnarmálunum.
Nú heyrir maður að óánægju gætir vegna þess að Bandaríkjaher er að fara í framkvæmdir á Keflavíkurflugvelli og íslenska ríkið þarf að leggja aðeins meira fé til Atlantshafsbandalagsins en ætlað var.

Staðreyndin er sú að hlutir eru að þróast með afar hvimleiðum hætti í Norðurhöfum. Rússar standa þar fyrir stórfelldri hervæðingu. Nágrannar þeirra Norðmenn eru farnir að hafa af því miklar áhyggjur og hafa aukið viðbúnað sinn. Og nú eru Bandaríkin aftur farinn að horfa aðeins til þessa svæðis – þótt aðalfókus þeirra sé reyndar á aðra heimshluta.

Þetta er sorgarsaga. Suðurskautið er alþjóðlegt friðland, herlaust svæði og nýtur mikillar verndar. Annað er uppi á teningnum á Norðurheimskautinu. Nú hopar ísinn þar og það magnar upp vígbúnað – enda hyggja þjóðir sem búa við Norðurskautið á stórfellda rányrkju. Rússar eru þar fremstir í flokki. Þarna mun brátt hefjast mikil skipaumferð og sókn í auðlindir – með hervald að bakhjarli.