Fréttablaðið skýrir frá þessu í dag. Lög um jafnlaunavottun voru sett þegar Þorsteinn Víglundsson var félags- og jafnréttismálaráðherra. Þau ná til fyrirtækja og stofnana með fleiri en 250 starfsmenn. Þau áttu að hafa öðlast jafnlaunavottun í lok síðasta árs en gildistöku laganna var frestað um eitt ár í nóvember á síðasta ári.
Fréttablaðið hefur eftir Þorgerði Katrínu Gunnarsdóttur, formanni viðreisnar og flokkssystur Þorsteins, að það þurfi að klára þennan kúf. Hún sagðist velta því fyrir sér hvort frestun gildistöku laganna hafi haldið aftur af hraðanum við vottunina og vonast til að gildistöku laganna verði ekki frestað aftur.
„Ég held að það væru vond skilaboð ef menn ætla eitthvað að fara breyta gildistökunni aftur. Ég trúi ekki að ríkisstjórnin með Vinstri græn í broddi fylkingar muni leggja áherslu á það heldur miklu frekar það að leysa úr þessu.“
Er haft eftir Þorgerði og bætti við að í heildina séu málin á réttri leið en það þurfi að horfa á þau með ákveðnum raunsæisgleraugum.
„Þetta má heldur ekki verða til þess að menn hummi þetta fram af sér. Ég vona að ríkisstjórnin gefi út þau skilaboð að það sé ekki rétta leiðin, heldur reynum við bara að vinna okkur í gegnum þetta. Þetta verður að vinnast í góðri samvinnu atvinnulífs og Jafnréttisstofu. Ég treysti þessum fagaðilum til þess.“
