Agi og bekkjarstjórnun eru stærra viðfangsefni í íslenskum skólum en á hinum Norðurlöndunum. Hins vegar eru ógnanir og svívirðingar gegn starfsfólki skóla sjaldgæfari hér en á hinum Norðurlöndunum.
Þetta kemur fram í tilkynningu frá Mennta- og menningarmálaráðuneytinu en þar er greint frá niðurstöðum alþjóðlegrar rannsóknar, TALIS, á viðhorfum kennara og skólastjórnenda til starfa sinna. Spurningarnar voru lagðar fyrir vorið 2018 og niðurstöður rannsóknarinnar kynntar núna í vikunni. Ísland tók nú átt í TALIS í þriðja sinn. Kennarar og skólastjórar á unglingastigi allra grunnskóla hérlendis voru í úrtaki könnunarinnar og var svarhlutfallið um 75%.
Helstu niðurstöður rannsóknarinnar eru eftirfarandi:
- Tækifæri til þess að gera gagn í samfélaginu og hafa áhrif á þroskaferil barna og ungmenna höfðu mest áhrif á ákvarðanir þátttakenda um að gerast kennarar. Einkenni starfsins, samfelldur starfsferill eða trygg afkoma höfðu að meðaltali meiri áhrif í öðrum þátttökulöndum.
- Íslenskir kennarar hafa meiri trú á sjálfum sér en aðrir kennarar á Norðurlöndum varðandi það að glæða áhuga nemenda sem eru áhugalitlir um námið, nota mismunandi námsmatsaðferðir og leggja góð verkefni fyrir nemendur.
- Íslenskir kennarar eru á heildina á litið ánægðir með starf sitt, en eru síður ánægðir með laun sín og viðhorf þjóðfélagsins til kennarastarfsins í samanburði við önnur þátttökulönd.
- Agi og bekkjarstjórnun eru stærra viðfangsefni í íslensku skólakerfi en gerist á hinum Norðurlöndunum. Ógnanir eða svívirðingar gagnvart starfsfólki skóla eru þó sjaldgæfari hér á landi en á hinum Norðurlöndunum.
- Íslenskir kennarar og skólastjórar virðast almennt taka meiri þátt í starfsþróunarverkefnum en gerist á Norðurlöndunum. Báðir hóparnir telja sig þó hafa meiri þörf fyrir þátttöku í slíkum verkefnum. Kennarar sækjast eftir verkefnum tengd bekkjarstjórnun, námsmatsaðferðum og kennslu í fjölmenningarlegu umhverfi.
- Íslenskir kennarar kalla eftir meiri eftir þjálfun í kennslu fjöltyngdra nemenda og nemenda með fjölmenningarlegan bakgrunn. Hlutfall skóla með fjölbreytta nemendahópa er svipað hér og á hinum Norðurlöndunum, en hérlendis telja kennarar og skólastjórar meiri þörf á slíkri þjálfun.