Lögmaðurinn Ómar Valdimarsson er himinlifandi með ný lög um kynrænt sjálfræði sem samþykkt voru á Alþingi í gær. Þetta kemur fram í pistli lögmannsins á vef Mannlífs.
Ómar segir ljóst að enginn leiki sér að því að láta leiðrétta kyn sitt eða breyta skráningu á kyni. Það sé vafalítið erfitt hlutskipti að burðast með þann böggul að upplifa að manni hafi verið úthlutað röngu kyni. Lítur Ómar á lögin sem mikið framfaraskref og mikla aukningu á persónufrelsi.
Í upphafi pistilsins reifar Ómar helsta inntak laganna með svofelldum hætti:
„Nýju lögin gera öllum einstaklingum kleift að skilgreina sjálfir kyn sitt, krefjast viðurkenningar opinberra og einkaaðila á kyni sínu, kynvitund og kyntjáningu. Í lögunum er líka kveðið á um rétt einstaklinga, til þess að krefjast þess að vera hvorki skilgreindir sem karlar eða konur – nú geta einstaklingar jafnframt krafist þess að skráning kyns þeirra sé hlutlaus. Í slíkum tilfellum er kyn viðkomandi t.d. í vegabréfum einfaldlega skráð sem „X“.
Framvegis verða allir einka- og opinberir aðilar að gefa fólki kost á því að skrá kyn sitt sem X, í kjölfar opinberrar breytingar þar um (að loknum skömmum aðlögunartíma). Þeir sem óska eftir breytingunni með formlegum hætti snúa sér til Þjóðskrár Íslands, sem gerir þá breytingu á kynskráningu viðkomandi í opinberum skrám. Þeir einstaklingar, sem kjósa að láta leiðrétta kyn sitt eiga þá líka rétt á því að fá endurútgefin t.d. prófskírteini frá skólum, með breyttu nafni sem viðkomandi framkvæmir samhliða breytingunni. Einstaklingar ráða því jafnframt sjálfir hvort þeir taki eignarfallsendingu föður eða móður (sleppi þá -son eða -dóttir í eftirnafninu sínu) eða skipti út -son eða -dóttir fyrir endinguna -bur.“
Ómar bendi að þingmenn allra flokka nema Miðflokksins hafi veitt málinu brautargengi.
