Greint er frá því á vef Félags atvinnurekenda (FA), að aðilar í íslenskum landbúnaði, bændur og afurðarstöðvar, hafi fengið úthlutað 47.5% af tollfrjálsum innflutningskvóta fyrir kjöt á seinni helming ársins, samkvæmt tollasamningi Íslands og ESB. Muni þeir því flytja inn tæplega 91% tollkvótans í svínakjöti og tæplega 60% í alifuglakjöti.
Ólafur Stephensen, framkvæmdastjóri FA, hefur löngum eldað grátt silfur við aðila landbúnaðarins vegna innflutnings kjöts og má segja að þar mætist stálin stinn, þar sem Ólafur og FA hafa talað fyrir auknum og óheftari innflutningi, meðan landbúnaðurinn hefur viljað draga úr innflutningi, ekki síst á ófrystu kjöti, þar sem af því geti stafað smithætta.
Ólafur segir að tvískinnungs gæti hjá bændum í afstöðu sinni, þar sýni tölurnar svart á hvítu:
„Þessar tölur staðfesta enn og aftur að þeir innlendu bændur og afurðastöðvar, sem hér um ræðir, taka í raun ekki mark á hræðsluáróðri gegn innfluttu kjöti, sem þó er stundum borinn fram í þeirra nafni. Það er orðið tímabært að þessir aðilar hætti tvískinnungnum og taki höndum saman við aðra innflytjendur kjöts frá Evrópusambandsríkjunum um að tryggja matvælaöryggi og hagstætt rekstrarumhverfi í frjálsum búvöruviðskiptum á milli Evrópulanda.“
Samkvæmt niðurstöðum útboðs atvinnuvega- og nýsköpunarráðuneytisins á tollkvóta fyrir seinni helming ársins fá innlendir bændur og afurðastöðvar úthlutað samtals 647,3 tonnum af 1.363 tonna tollkvóta. Þetta er talsverð aukning frá fyrri helmingi ársins, en þá fengu aðilar í innlendum landbúnaði úthlutað 573,5 tonnum, sem samsvaraði 41% tollkvóta
Eins og taflan sýnir er Mata langumsvifamesti innflytjandinn í þessum hópi. Mata er systurfélag Matfugls, eins stærsta kjúklingaræktanda landsins, og Síldar og fisks, sem er umsvifamikill svínaræktandi og selur vörur sínar undir vörumerkinu Ali. Mata fékk í sinn hlut um það bil um 54% þess tollkvóta sem bændur og afurðastöðvar flytja inn, eða 350 tonn af kjötvörum.