Andri Már Ingólfsson, fyrrum aðaleigandi Primera Air, greiddi tæplega 200 milljónir í reiðufé til þrotabús félagsins gegn því að fallið yrði frá málsóknum á hendur honum. Auk þess samþykkti Andri Már að falla frá þeim kröfum sem hann hafði lýst í þrotabúið en kröfur hans og félaga á hans vegum námu rúmlega tveimur milljörðum króna.

Markaður Fréttablaðsins skýrir frá þessu í dag. Fram kemur að samkomulag hafi náðst um þetta á milli Andra Más og þrotabús Primera Air á Íslandi í síðasta mánuði. Eiríkur Elís Þorláksson, lögmaður, stýrir þrotabúinu.

Andri var næststærsti kröfuhafi búsins á eftir Arion banka. Primera Air og erlend dótturfélög voru tekin til gjaldþrotaskipta í október í fyrra. Rúmlega 10 milljarða króna kröfum hefur verið lýst í búið.

Í skýrslu skiptastjóra, sem var lögð fram á skiptafundi þrotabúsins í febrúar, kom fram að rannsóknir hans hefðu leitt í ljós að hugsanlega hafi forsvarsmenn þess bakað því tjón í tveimur tilvikum hið minnsta. Þá kom fram að skiptastjórinn hefði til skoðunar hvernig staðið var að reikningsskilum fyrirtækisins.