Ástþór Magnússon, stofnandi Friðar 2000 og fyrrverandi forsetaframbjóðandi, segir í tilkynningu til fjölmiðla að í dag sé tækifærið fyrir VG að stuðla að friði.
Jens Stoltenberg, framkvæmdastjóri NATO, er kominn hingað til lands til að hitta utanríkisráðherra og forsætisráðherra í Ráðherrabústaðnum. Hann mun einnig flytja erindi í Norræna húsinu síðdegis á vegum Alþjóðamálastofnunar Háskóla Íslands undir yfirskriftinni „NATO og Ísland í 70 ár: Öflug samvinna á óvissutímum.“
Ástþór telur að Stoltenberg sé „málpípa“ Bandaríkjanna og sé hingað kominn til að fá stuðning Íslands við innrás inn í Íran eða Venesúela og skorar á Katrínu Jakobsdóttur að draga sig út úr hernaðarsamstarfi við Bandaríkin:
Í dag á græninginn Katrín Jakobsdóttir forsætisráðherra fund með stríðsóðum Jens Stoltenberg málpípu þeirra bandaríkjamanna sem hafa unnið undir huliðsvæng Íslenskra stjórnvalda að sölsa undir sig Keflavíkurflugvöll undir stjórnstöð nýrrar styrjaldar.
Er verið að endurtaka þátttöku í stríði í Mið Austurlöndum? Nú gegn Íran? Bandaríkjamenn stefna nú á að stórauka herafla sinn á svæðinu til að hefja styrjöld gegn Íran. Á sama tíma og þeir hóta styrjöld gegn Íran hóta þeir innrás í Venúsaela sem einnig virðist með stuðningi Íslenskra stjórnvalda.
Tækifæri Vinstri Grænna til að stuðla að friði er í dag. Ekki eftir að þjóðin er búin að kjósa flokkinn og þeirra forsætisráðherra út í horn valdalausrar stjórnarandstöðu.
Ég skora á Katrínu Jakobsdóttur að draga Ísland út úr þessu hernaðarsamstarfi við bandaríkin. Við eigum enga samleið með þjóðum sem hóta hernaði til vinstri og hægri, sem virða að vettugi umhverfisvernd og mannréttindi og vil stuðla að einangrunarstefnu og fasisma í stað lýðræðis og friðar.