Umhverfis- og samgöngunefnd Alþingis ákvað í gær að óska eftir því við ríkisendurskoðanda að hann geri skýrslu um aðkomu Samgöngustofu og Isavia ohf. að starfsemi og rekstri WOW air í aðdraganda og kjölfar gjaldþrots flugfélagsins.

Fréttablaðið skýrir frá þessu í dag. Þar kemur fram að beiðnin sé að frumkvæði Helgu Völu Helgadóttur þingmanns Samfylkingarinnar. Í henni er óskað eftir úttekt á hvernig Samgöngustofa uppfyllti hlutverk sitt og hvort Isavia hafi fylgt eigin reglum í viðskiptum við WOW air.

„Það er nauðsynlegt að fram fari óháð fagleg úttekt á aðdraganda falls WOW air, ekki síst vegna þess hversu lengi stjórnvöld virðast hafa verið meðvituð um alvarlegan vanda félagsins.“

Hefur blaðið eftir Helgu Völu.