Tæplega 40 þúsund færri ferðamenn fóru frá Keflavíkurflugvelli í maí samanborið við maí í fyrra. Fækkun milli ára nemur 23,6 prósentum. Þetta kemur fram í tilkynningu frá Ferðamálastofu.
Samkvæmt tilkynningu hefur ferðamönnum fækkað alla mánuði þessa árs, 5,8 prósent í janúar, 6,9 prósent í febrúar, 1,7 prósent í mars, 18,5 prósent í apríl og svo 23,6 í síðasta mánuði.
Það sem af er ári hafa 702 þúsund erlendir ferðamenn farið frá Íslandi um Keflavíkurflugvöll, eða 11,2 prósent færri en í fyrra.
Af einstaka þjóðernum voru flestar brottfarir í maí tilkomnar vegna Bandaríkjamanna sem fyrr segir. Þjóðverjar voru í öðru sæti hvað fjölda varðar eða níu þúsund talsins og fækkaði þeim um 23,8% milli ára og Bretar í þriðja sæti eða tæplega níu þúsund og fækkaði þeim um 16%.
Samkvæmt upplýsingum Ferðamálastofu fækkaði mest farþegum frá Bandaríkjunum sem voru 38,7 prósent færri en í fyrra, og áberandi fækkun farþega frá Ísrael eða 64,4 prósent færri.
Jakob Frímann Magnússon og Kristófer Óliversson, skrifuðu grein í Fréttablaðið í dag þar sem þeir skoruðu á ríkisstjórnina að bregðast við alvarlegum vanda sem íslenska ferðaþjónustan horfist nú í augu við. Erlend flugfélög hafa látið af íslandsflugi eða minnkað það mikið og samkvæmt ofangreindum tölum frá Ferðamálastofu er marktæk fækkun ferðamanna á þessu ári.