Dóra Björt Guðjónsdóttir, forseti borgarstjórnar og borgarfulltrúi Pírata, styður tillögur Sjálfstæðisflokksins um að skora á Alþingi að afnema einokunarverslun ríkisins með áfengi. Þá skorar hún einnig á Vínbúð ÁTVR í Austurstræti að fá sér bjórkæla, sem Vilhjálmur Vilhjálmsson, þáverandi borgarstjóri, óskaði eftir að yrðu fjarlægðir árið 2007. Segir hún að Vilhjálmur hafi reynt að losna við rónana með því að neyta þeim um kaldan bjór, sem sé skammsýni:
„Á meðan við ræddum málið í marga klukkutíma á síðasta borgarstjórnarfundi mundi ég eftir því þegar borgarstjóri Sjálfstæðisflokksins ákvað að taka út kæla úr Vínbúðinni í Austurstræti og banna sölu stakra bjóra. Til þess þá að reyna að bola heimilislausu fólki með margþættan vanda í burtu af Austurvelli, eins og þú losnir allt í einu við áfengisvanda með því að bjóðast ekki lengur kaldur, áfengur drykkur. Tel ég þetta því vera magnaða skammsýni sem kemur svo bara niður á öllum á svæðinu,“
er haft eftir Dóru Björt í Fréttablaðinu, en hún skrifar einnig um þetta á Facebook síðu sína.
Þá er einnig haft eftir Dóru Björt að henni hugnist ekki neyslustýring:
„Neyslustýring hefur oft ekki tilætluð áhrif. Mér finnst, byggt á mínum frjálslyndis- og umburðarlyndishugsjónum, að við eigum frekar að hjálpa og styðja við fólk en að stjórna því. Við eigum ekki að hafa alltaf áhyggjur af því að fólk vilji njóta lífsins.“
Fréttablaðið hefur eftir Sigrúnu Ósk Sigurðardóttur, aðstoðarforstjóra ÁTVR, að húsnæðið í Austurstræti bjóði ekki upp á stóran kæli, en hún vildi að öðru leyti ekki tjá sig um málið. Þurfa því gestir miðborgarinnar að láta sér lynda „hlandvolgt“ öl að sinni.
Dóra segir það skjóta skökku við að Sjálfstæðismenn í borginni leggi fram slíka tillögu, þar sem þeir hafi haft völd á Alþingi í áratugi. Hún segist samt styðja tillögu þeirra, líkt og aðrir Píratar gerðu, Viðreisn og tveir fulltrúar Samfylkingarinnar. Tillagan mætti þó andstöðu eins borgarfulltrúa Sjálfstæðismanna, Arnar Þórissonar, sem og hjá Flokki fólksins, Miðflokknum, Sósíalistum og VG.
Líkt og Eyjan greindi frá í gær hafa aldrei fleiri Íslendingar viljað fá léttvín eða bjór í matvöruverslanir, eða 44 prósent, samkvæmt könnun Maskínu.
