Lag sem ég syng oft fyrir munni mér þegar ég geng upp Skólavörðustíginn og upp á holtið. Útumholtoghólablús með Megasi og Spilverkinu:
Hljóðlátt er holtið
en í Hábænum iðkaður ómstríður söngur var fyrr.
Hljóðlátt er holtið
en í Hábænum iðkaður ómstríður söngur var fyrr.
Ó langt er nú um liðið
síðan láréttum í hinsta sinn þar verðir mér vörpuðu á dyr.
Hábær var veitingahús sem stóð efst á Skólavörðustíg, þar sem nú er hótel sem er kennt við Leif Eiríksson. Í kvæði Megasar sér maður Hábæ fyrir sér sem athvarf drykkjurúta og bóhema – það er víst ekki alveg fjarri sanni. Mannlifið á þessum stað þótti heldur skrautlegt – þangað sótti fólk sem kaus að vera undir áhrifum sem flesta daga vikunnar.
En Hábær átti líka aðra hlið. Þar var um tíma rekinn kínverskur veitingastaður – kannski sá fyrsti í Reykjavík. Hann kallaðist Kínverski garðurinn og var í eins konar garðskála bak við steinhúsið. Ég man að foreldrar mínir fóru þangað eitt sinn að borða, voru prúðbúin. En áhrifin frá sjálfum Hábæ smituðust yfir í kínverska staðinn – pabbi og mamma kvörtuðu undan því þegar þau komu heim að þau hefðu ekki fengið frið til að borða fyrir drykkjumönnum.
Sjálfur kom ég aldrei í Hábæ, en af sögunum að dæma og kvæði Megasar finnst mér eitthvað óendanlega fyndið við þennan stað.
Seinna var svo rekið fyrsta mini-golf á Íslandi í þessum garðskála. Þá var búið að loka Hábæ, en framkvæmdamaðurinn sem setti upp mini-golfið var sjálfur Valbjörn Þorláksson íþróttagarpur. Valbjörn var margfaldur methafi í stangarstökki, glæsimenni, mikill kvennaljómi og þekktur fyrir að vera sólbrúnasti maður á Íslandi. Sögur fóru af sólböðum Valbjörns. En hann er svo frægur að höfuðskáldið Þórarinn Eldjárn setti hann í kvæði sem byrjar svona Gaman er að stökkva á stöng.
En okkur skortir allan dug,
við eigum ekki slíkan hug.
Enginn Hómer, ekki neitt,
ekkert nema rövlið eitt.
Margt eitt fól þó stökkvi á stöng
er stefnan bæði lág og röng.
Staðreyndin er semsagt sú
að Sveinbjörn heitir Valbjörn nú.
Þá var öldin önnur er Sveinbjörn stökk á stöng,
þá var ei til Bessastaða leiðin löng.