Ragnar Önundarson, fyrrverandi bankastjóri Iðnaðarbankans sáluga, vanda Samkeppniseftirlitinu ekki kveðjurnar, en hann telur stofnunina stuðla að fákeppni með því að leyfa samruna olíufélaga og smávöruverslana:
„Hagar keyptu Olís. Skeljungur og 10-11 sameinast. N1 tók Krónuna / Nóatún yfir. Viðbrögð fákeppnisfélaga við alvöru samkeppni (Costco) er aukin fàkeppni. Samkeppniseftirlitið samþykkir með skilyrðum sem fljótt gleymast.“
Hann kennir máttleysi Samkeppniseftirlitsins um að fákeppni ríki á öllum helstu sviðum viðskiptalífsins og kallar eftir því að settur verði á ofurskattur:
„Samkeppnisyfirvöld klóra sèr í hausnum, aðgerðalaus, úrræðalaus, máttlaus. Þau eru ,,fangar“ fyrri ákvarðana, sem skapa fordæmi: Þau hafa starfað í 25 ár undir tveimur nöfnum, kennitölum og forstjórum. Samkeppnisstofnun og Samkeppniseftirlit. Samrunar og yfirtökur hafa næstum alltaf hlotið samþykki. Fákeppni rîkir á öllum helstu sviðum viðskiptalífsins. Handleiðsla samkeppnisyfirvalda hefur ekki verið í þágu neytenda. Sífellt er verið að samþykkja aukna fákeppni (samruna), en afleiðingin er samráð eða lærð hegðun sem er neytendum skaðleg. Hinir fáu eigendur fákeppnisfélaganna hirða árlegan gulltryggðan arð sem skattlagður er 20%. Nær væri að setja ofurskatt á sjálftökugróðann sem hluthafarnir fá í arð. Eitthvað þarf að gera svo fákeppnisrekstur verði óhagkvæmur fyrir hluthafana.“
Samkeppniseftirlitið ógilti á dögunum samruna Samkaupa og Basko verslana ehf sem það hafði áður samþykkt, þar sem samruninn hefði raskað samkeppni á Akureyri og Reykjanesbæ. Basko á og rekur verslanir Iceland og 10-11.
Þá má geta þess að samtals nema sektir Samkeppniseftirlitsins um 8.6 milljörðum króna í 81 máli frá 2001 til 2018, líkt og Eyjan hefur áður fjallað um.
Sjá nánar: Sektir Samkeppniseftirlitsins nema rúmlega 8,6 milljörðum – Síminn hf. oftast sektaður