Þingfundur stóð yfir á Alþingi frá 13.30 í gærdag og til um 8.40 í morgun. Seinni umræða um þriðja orkupakkann hefur staðið yfir frá 14.15 í gærdag, en þingmenn Miðflokksins hafa einokað ræðupúltið með málþófi, í þriðja skiptið á nokkrum dögum.
Á vef mbl.is er greint frá því að skömmu fyrir klukkan sjö las Ólafur Ísleifsson upp Reykjavíkurbréf Morgunblaðsins frá 11. maí í ræðupúlti þingsins, en telja má víst að nokkuð sé um liðið frá því að Davíð Oddsson tók síðast þátt í málþófi á Alþingi.
Þingfundur hefst að nýju í dag klukkan 15.
Þingstörfum á að ljúka þann 5. júní. Vegna málþófs Miðflokksins hafa störf þingsins riðlast nokkuð og enn bíða 71 lagafrumvarp fyrstu umræðu og tíu bíða annarrar umræðu.
Þá eru 113 þingsályktunartillögur sem bíða afgreiðslu og 142 fyrirspurnir sem þingmenn eiga eftir að svara. Margar þeirra eru frá Birni Leví Gunnarssyni, þingmanni Pírata.
Hjá þingnefndum eru 105 lagafrumvörp til meðferðar en aðeins fimm þingfundardagar eru eftir samkvæmt plani.
Steingrímur J. Sigfússon, forseti Alþingis, segir við Fréttablaðið að hann hyggist ekki virkja ákvæði í þingskaparlögum sem heimilar forseta þingsins að stöðva umræður eða stytt þær:
„Það hefur ekki komið til tals og menn verða að fara varlega í þeim efnum. Nú skulum við sjá til hvernig framvindan verður. Fram undan eru þingnefndardagar svo það er ekki tímabært að velta því fyrir sér á þessum tímapunkti.“
