Það muna líklega ekki margir, en áður en Íslendingar tóku fyrst þátt í Evróvisjón höfðu íslenskir tónlistarmenn verið með í hátíð sem var haldin í andstöðu við Evróvisjón. Þetta var í Svíþjóð 1975. Abba hafði unnið keppnina árið áður með laginu Waterloo – og varð þannig eitt af tveimur tónlistaratriðum sem hafa náð heimsfrægð eftir Evróvisjón, hitt er Celine Dion.

En á þessum árum var fólk róttækt, fannst Evróvisjón vera tóm froða og í Svíþjóð var sett upp svokallað Alternativfestival. Þetta var heilmikil hátíð og vakti mikla athygli. Ég á meira að segja einhvers staðar litla plötu með lagi sem kom út á hátíðinni – Doin’ the omoralisk schlagerfestival.

Eins og lesa má í meðfylgjandi frétt úr Tímanum fór sendinefnd af Íslandi til að taka þátt. Söngsveitin Þokkabót, Megas, trúbadúrinn Örn Bjarnason og svo hljómsveit undir stjórn Gunnars Þórðarsonar. Í greininni segir að Íslendingarnir hafi vakið gífurlega athygli, sérstaklega hljómsveit Gunnars Þórðarssonar.

Það virðist líka hafa verið býsna áhugaverður hópur sem spilaði með Gunnari – Jakob Magnússon, sem segir að hafi komið frá London, Pálmi Gunnarsson, Ásgeir Óskarsson, Ari Jónsson,og Halldór Pálsson.

Svo les maður líka í greininni að eitthvað af hátíðinni hafi verið kvikmyndað – það væri forvitnilegt að vita hvort einhvers staðar leyndust upptökur með íslensku tónlistarmönnunum sem tóku þátt í þessari and-Evróvisjónhátíð.