Evróvisjónatriði Hatara hefur verið lýst sem ádeilu á kapítalisma og sjálfir hafa Hatarar talað á þeim nótum.
En kapítalisminn er óseðjandi. Hann gín yfir öllu, gleypir allt í sig, mylur það og bryður, kjamsar, lætur sér gott þykja og dæsir svo af seddu.
Við sjáum til dæmis þessa auglýsingu frá skyndibitakeðjunni KFC sem birtist á Vísi. Það fylgir meira að segja gríma með brasaða kjúklingnum – meðan birgðir endast.
Og svona var kjötkælirinn í Hagkaupum á Nesinu í gærkvöldi.
Og þetta er frá Mjólkursamsölunni.
Annars hafa Hatarapiltarnir staðið sig með sóma. Þeir hafa heimsótt herteknu svæðin og kynnt sér skelfingarástandið og óréttlætið þar af eigin raun. Þeir hafa talað gegn hernámi Ísraels og fengið ofanígjöf frá framkvæmdastjóra keppninnar, náunga sem heitir Jan Ola Sand. Þetta þýðir að þeir eru að gera eitthvað rétt, en þetta er þó ekki djarfara en svo að samkvæmt fjölda ályktana Sameinuðu þjóðanna er hernám Ísraels í Palestínu ólöglegt.
Það er illa komið í hræsninni þegar ekki má viðra jafn einföld sannindi. Matthías Tryggvi Haraldsson orðar þetta ágætlega í viðtali sem sænska sjónvarpið tók við Hatara:
„Tel Aviv er skýlt fyrir umheiminum og að halda keppnina hér er afar pólitískt í eðli sínu, að syngja um ást án þess að horfast í augu við raunveruleikann og pólitískt eðli keppninnar,“