Fyrirtækin Runo ehf. og IP ehf. hafa sótt um leyfi til hrefnuveiða næstu fimm vertíðir, til ársins 2023. Þá hefur Hvalur hf. sóst eftir leyfi til veiða á langreyði. Fréttablaðið greinir frá en eigandi Runo ehf. er Þröstur Sigmundsson, sem er eiginmaður Silju Daggar Gunnarsdóttur, þingmanns Framsóknarflokksins.

Silja Dögg situr í utanríkismálanefnd, en hvalveiðar Íslands hafa lengi þótt mikið hitamál og fyrir liggur þingsályktun frá Þorgerði Katrínar Gunnarsdóttur þar sem þess er farið á leit að rannsakaður verði stuðningurinn erlendis frá við hvalveiðar Íslendinga og áhrif þeirra á ímynd landsins.

Silja Dögg sagði í samtali við Eyjuna í morgun að þetta væru nú ekki nýjar fréttir:

„Þetta hefur aldrei verið neitt leyndarmál, maðurinn minn keypti bát árið 2016, en þetta hefur ekki verið rætt neitt sérstaklega í utanríkismálanefnd, enda engin ástæða til. Við erum auðvitað gift þannig að ég hlýt að eiga helminginn í þessu.“

Silja segist fylgjandi hvalveiðum:

„Já auðvitað. En ég hef aldrei farið á hrefnuveiðar“.