Töluverður áhugi og fyrirætlanir eru nú uppi um að byggja upp vindorkuver víða hér á landi. En það getur staðið þessari uppbyggingu fyrir þrifum að flutningskerfi Landsnets getur ekki tekið við nema litlum hluta þeirrar raforku sem þessi væntanlegu vindorkuver munu framleiða.

Landsnet getur tengt 85 MW við flutningsnet sitt en mun meiri raforkuframleiðsla en það er í kortunum miðað við ýmsar fyrirætlanir víða um land. Morgunblaðið skýrir frá þessu. Á vesturhluta landsins er fyrirhugað að reisa þrjá vindmyllugarða sem geta framleitt allt að 410 MW. Á Vestfjörðum eru hugmyndir um vatnsaflsvirkjanir á borðinu.

En Landsnet getur aðeins tengt 85 MW við flutningskerfið en það svarar til fyrsta áfanga eins vindorkuvers.

Samkvæmt lögum á Landsnet að tengja alla þá sem vilja við flutningskerfið. Líklega þarf fyrirtækið að beita undanþáguákvæði laganna og synja flestum þeirra, sem óska eftir tengingu á vesturhluta landsins, um aðgang.

Morgunblaðið segir að Landsnet sé nú að meta þá kosti sem eru líklegast til að mæta aukinni þörf fyrir flutning á þessu svæði en slíkar aðgerðir taka tíma og kalla á fjárfestingu.