Gleðítíðindi urðu í Hrafnistu í Laugarási þegar 30 ný dagdvalarrými voru tekin þar í notkun, ætluð heilabiluðum. Í fréttatilkynningu á vef Stjórnarráðs Íslands um málið, segir meðal annars:
„Opnuð hefur verið í Hrafnistu í Laugarási ný dagdvöl ætluð heilabiluðum með aðstöðu fyrir 30 einstaklinga. Aðstöðunni var komið á fót með breytingum á húsnæði sem ekki var lengur hægt að nýta til reksturs hjúkrunarrýma. Hjúkrunarrýmin voru 11 í aðstöðu sem uppfyllti enganveginn nútímakröfur um aðstæður fólks á hjúkrunarheimilum. Heilbrigðisráðherra gerði nýsköpun og getuna til að sjá tækifæri í breyttum aðstæðum að umtalsefni í ávarpi sem hún flutti við vígslu deildarinnar.
Nýja dagdvalardeildin á Hrafnistu er kölluð Viðey og dregur heiti sitt af fallegu útsýni út á Sundin þar sem Viðey blasir við. Pétur Magnússon, forstjóri Hrafnistu segir að vegna langra biðlista eftir dagdvalarrýmum fyrir heilabilaða á höfuðborgarsvæðinu sé deildin kærkomin viðbót við þá faglegu þjónustu sem einstaklingar með heilabilun þurfi á að halda.
Svandís Svavarsdóttir heilbrigðisráðherra fagnaði frumkvæði stjórnenda Hrafnistu í ávarpi sem hún flutti við vígsluhátíðina á Hrafnistu í gær, þar sem fjöldi fólks kom saman til að fagna opnun deildarinnar.“