Borgarráð samþykkti 2. maí sl. nýjar reglur Reykjavíkurborgar um félagslegt leiguhúsnæði. Nýjar reglur ná yfir allt félagslegt leiguhúsnæði í Reykjavík og er þar átt við almennt félagslegt leiguhúsnæði, húsnæði fyrir fatlað fólk, þjónustuíbúðir aldraða og húsnæði fyrir heimilislausa með miklar og flóknar þjónustuþarfir. Þetta kemur fram í tilkynningu.
Helstu nýmæli í nýjum reglum eru t.d. að matsviðmið varðandi félagslegt leiguhúsnæði eru gerð ítarlegri og skýrari. Húsnæði fyrir fatlað fólk er skipt í tvo flokka; sértækt húsnæði og húsnæði með stuðningi. Við úthlutun á þjónustuíbúðum aldraða verður aðaláherslan lögð á þörfina fyrir þjónustu og stuðning sem ekki er hægt að veita í núverandi húsnæði. Húsaleigusamningar fyrir almennt félagslegt leiguhúsnæði verða nú gerðir fyrst til þriggja ára en voru áður ótímabundnir. Samningarnir verða síðan að jafnaði gerðir ótímabundnir eftir fyrstu þrjú árin.
Nýjar reglur leysa af hólmi reglur um þjónustuíbúðir fyrir aldraða og reglur um félagslegt leiguhúsnæði og sérstakar húsaleigubætur.
Reglurnar voru unnar í samvinnu við hagsmunasamtök, t.d. Öryrkjabandalag Íslands, Þroskahjálp, Geðhjálp, Félag eldri borgara og Öldungaráð Reykjavíkur.
Nýjar reglur taka gildi þann 1. júní næstkomandi.
