Stjórn Félags íslenskra leikara (FÍL) mun senda bréf til Þjóðleikhúsráðs og Lilju Alfreðsdóttur, mennta- og menningarmálaráðherra, vegna hegðunar og framkomu Ara Matthíassonar, þjóðleikhússtjóra, sem kvartað hefur verið undan formlega á liðnum árum, til dæmis vegna samningsbrota, hegðunar og erfiðra samskipta. Fréttablaðið greinir frá.

Kvartanirnar hafa borist bæði Þjóðleikhúsráðinu sem og ráðherra menningarmála, vegna samskipta þjóðleikhússtjóra við félagsmenn FÍL og var það niðurstaða opins fundar FÍL á fimmtudag að senda bréfið þar sem kvartað er yfir aðgerðarleysinu yfir áðurnefndum kvörtunum.

Einnig er lagt til að Þjóðleikhúsráð fái utanaðkomandi sérfræðing í vinnuvernd og mannauðsmálum til að fara ofan í saumana á samskiptum þjóðleikhússtjóra við félagsmenn FÍL.

Er staðan í Þjóðleikhúsinu sögð viðkvæm samkvæmt Fréttablaðinu, en leikarar funduðu á þriðjudag og er fundurinn sagður hafa verið tilfinningaríkur, þar sem sumir hefðu kannast við þær lýsingar sem hafðar voru um þjóðleikhússtjóra, en aðrir ekki.

Skömmu fyrir páska sendi lögmaður FÍL bréf til Þjóðleikhúsráðs sem og þjóðleikhússtjóra, þar sem kvartanir á hendur honum höfðu verið teknar saman og bent á að eðlilegt væri að þær lægju til grundvallar þegar ákvörðun væri tekin um ráðningu nýs þjóðleikshússtjóra, en skipunartími Ara rennur út 1. janúar á næsta ári, en starfið hefur verið auglýst lögum samkvæmt.