„Það er langt gengið, þegar íslenzka utanríkisráðuneytið kallar eftir hótunum erlendis frá um hvað kunni að gerast hafni Alþingi orkupakka 3. Hér skal fullyrt að frá því að lýðveldi var stofnað á Íslandi hefur slíkt aldrei gerzt fyrr.“
Þetta segir Styrmir Gunnarsson, fyrrverandi ritstjóri Morgunblaðsins, í færslu á bloggsíðu sinni. Tilefnið er greinargerð sem Carl Baudenbacher, lagaprófessor og fyrrverandi dómari við EFTA-dómstólinn, vann fyrir utanríkisráðuneytið vegna þriðja orkupakkans. Nokkuð var fjallað um greinargerðina í fjölmiðlum í gær en í henni er Ísland varað við því að hafna innleiðingu þriðja orkupakkans.
Styrmir er ósáttur með þetta og spyr hverra hagsmuna sé verið að gæta með vinnubrögðum sem þessum.
„Það verður fróðlegt að sjá, hvort einhverjir þingmenn á Alþingi Íslendinga sjái ástæðu til að gera athugasemd við vinnubrögð af þessu tagi,“ segir Styrmir sem einnig spyr hvort einhverjum detti í hug að slíkt „pantað álit“ hafi sagt eitthvað annað.
„Dettur einhverjum í hug, að hægt sé að fá „hlutlaust“ álit frá þeim aðila, sem um ræðir?! Og dettur einhverjum í hug að íslenzka þjóðin láti hóta sér meðþessum hætti? Þetta var mjög misráðin aðgerð, svo ekki sé meira sagt,“ segir hann.