Neytendasamtökin gagnrýna Creditinfo fyrir að leyfa smálánafyrirtækjum að beita vanskilaskrá gegn neytendum til að knýja fram greiðslu á ólöglegum vöxtum. Þetta kemur fram í ályktun samtakanna.
Margir aðilar sem hafa endað á vanskilaskrá Creditinfo vegna smálána hafa snúið sér til Neytendasamtakanna.
„Í kjölfarið hafa Neytendasamtökin upplýst Creditinfo að smálánafyrirtækin og innheimtuaðilar þeirra nota Creditinfo sem svipu til að fá þá til að borga lán með ólöglegum vöxtum. Þá er með ólíkindum að Creditinfo verði við óskum þessara fyrirtækja sem brjóta lög og siðferði.“
Neytendasamtökin beina þeim kröfum til Creditinfo að þeir láti af því að skrá einstaklinga, sem ekki greiði af ólöglegum smálánum, á vanskilaskrá. Að sama bragði gera þeir kröfu um að allir þeir sem þegar eru skráðir á vanskilaskrá vegna slíkra lána verði teknir af listanum
„Sér í lagi þar sem Hákon Stefánsson, stjórnarmaður Creditinfo group hefur opinberlega skorað á fólk að greiða ekki þessi lán.“
Einnig fara samtökin fram á að Creditinfo hættu að beita svo nefndri öfugri sönnunarbyrði.
„Það á ekki að líðast að einstaklingar, sem oft þekkja ekki rétt sinn og geta ekki borið hönd fyrir höfuð sér, þurfi að andmæla kröfum sem byggja á ólöglegum lánveitingum, ella lendi þeir á vanskilaskrá og dúsi þar í allt að fjögur ár.“
„Creditinfo hefur mikil völd yfir fjárhagsupplýsingum og fjárhagslegri framtíð fólks og þeim verður að fylgja samfélagsleg ábyrgð. Dómar hafa fallið um ólögmæti smálána, úrskurðir Neytendastofu eru skýrir og vilji löggjafans er skýr. Ólögleg smálán eiga ekki að líðast.“
Neytendasamtökin telja ljóst að smálánafyrirtæki geti aðeins starfað í skjóli fyrirtækja sem greiði götu þeirra.
„Þannig berst einstaklingum fjöldi smáskilaboða í gegnum símakerfið, auglýsingar frá smálánafyrirtækjum birtast í kvikmyndahúsum og í fjölmiðlum, innheimtufyrirtæki taka að sér að innheimta ólöglegar kröfur og smálánafyrirtækin nýta greiðslumiðlunarkerfi fjármálakerfisins. Til eigenda, stjórnenda og starfsmanna þessara fyrirtækja beinir stjórn Neytendasamtakanna þeim tilmælum að sýna samfélagslega ábyrgð og hætta að styðja við smálánafyrirtækin.“
Neytendasamtökin hvetja félagsmenn sína sem og aðra sem eru á vanskilaskrá vegna smálána að senda beiðni á Creditinfo um að vera tafarlaust tekinn af skránni.
„Við hvetjum félagsmenn og aðra sem lent hafa á vanskilaskrá Creditinfo vegna smálána að senda þeim beiðni um að láta taka sig af skránni og afmá öll ummerki um veru þar á mailto:creditinfo@creditinfo.is og setja mailto:ns@ns.is í cc.
Bréfið gæti litið svona út:
Til þess er málið varðar,
Ég lenti á vanskilaskrá vegna ólöglegra smálána. Vinsamlega takið mig af vanskilaskránni tafarlaust og afmáið öll ummerki um veru mína þar.
Vinsamlega verðið við beiðni minni sem fyrst og eigi síðar en að 10 dögum liðnum.
Virðingarfyllst,
Nafn. Xxxxx Xxxxx
Kennitala: xxxxxx–xxxx“
