Creditinfo hefur brugðist við gagnrýni Neytendasamtakanna, sem greint var frá fyrr í dag, um skráningu skuldara smálána á vanskilaskrá. Samkvæmt tilkynningu frá Creditinfo mun fyrirtækið nú skerpa á ferlun varðandi skráningu á vanskilum lána til að tryggja réttmæti skráninga.
„Í ljósi vafa um lögmæti kostnaðar af tilteknum tegundum lána og sérstaklega þá fyrirætlan ráðherra að leggja fram frumvarp sem mun taka á þessum vanda telur Creditinfo rétt að miða skráningu vanskila við höfuðstól þeirra lána sem bera kostnað umfram lögbundið hámark samkvæmt lögum um neytendalán.“
Í tilkynningu segir að það sé mikilvæg að eftirlitsaðilar og stjórnvöld séu vakandi og bregðist hratt við ef aðilar á markaði eru ekki að fylgja lögum og reglum í landinu. Lánafyrirtæki fylgi almenn lögum um neytendalán.
„Creditinfo fagnar því að skýrt verði kveðið á um aðgerðir gegn lánastarfsemi sem brýtur á ákvæðum laga um hámarkskostnað við lántöku. Creditinfo mun að sjálfsögðu framfylgja ákvörðunum stjórnvalda í þessum málum og sjá til þess að okkur berist réttmætar upplýsingar varðandi skráningar á vanskilaskrá því hlutverk hennar er að styðja við ábyrga lánastarfsemi í landinu. Í ljósi þessa þá er brýnt að stór-efla fræðslu til neytenda varðandi lán og kostnað sem hlýst af þeim,“ segir Sigríður Laufey Jónsdóttir lögfræðingur Creditinfo.“