Hvaða flugvöllur er bestur í heiminum, hver er verstur og hvar á milli lendir Leifsstöð? Þessari spurningu er reynt að svara hvað árið 2019 varðar í nýrri rannsókn, en segja má að flugvöllur okkar Íslendinga í Keflavík komi einstaklega illa út úr henni.
Rannsóknin var á vegum AirHelp, fyrirtæki sem aðstoðar farþega flugfélaga með bótakröfur vegna seinkana, afbókana og yfirbókana. Rannsóknin náði til 72 flugfélaga og 132 flugvalla og byggði á 40 þúsund umsögnum farþega.
Flugvellirnir fá einkunnir fyrir mismunandi atriði: Hvort flugáætlanir standist, hver gæði þjónustunnar séu og úrval af mat og verslun. Keflavíkurflugvöllur kemur ekki vel út í rannsókninni og lendir í 102. sæti af 132. Lægstu einkunnina fær hann fyrir tímaáætlanir eða 6,2 af 10 mögulegum. Heildareinkunn er rétt rúmlega 7 af 10. Það eru því aðeins 30 flugvellir á listanum sem teljast verri en aðalflugvöllur okkar Íslendinga.
Á toppnum trónir Hamad flugvöllurinn í Katar með 8,39 af 10 mögulegum. Þar á eftir kemur alþjóðlegi flugvöllurinn í Tókýó, Japan, sem er einnig með 8,39, og í þriðja sæti er alþjóðlegi flugvöllurinn í Aþenu, Grikklandi, með 8,38.
Verstur, samkvæmt rannsókninni, er Portela flugvöllurinn í Portúgal með einkunnina 5,77. Rétt fyrir ofan hann er flugvöllurinn í Kúveit með 5,78 og aðeins ofar er flugvöllurinn í hollensku borginni Eindhoven með 5,92.
