Össur Skarphéðinsson, fyrrverandi formaður og utanríkisráðherra Samfylkingarinnar, skrifar um þriðja orkupakkann á Facebook síðu sína, hvar hann bendir á að Jón Baldvin Hannibalsson, þáverandi formaður Alþýðuflokksins, hafi barist hart fyrir lagningu sæstrengs til Skotlands, en Jón Baldvin er nú einn helsti andstæðingur þriðja orkupakkans:

„Sjálfur hef ég afar vonda fortíð í þessu máli. Þegar ég gekk í Alþýðuflokkinn á sínum tíma, marghrakinn flóttamaður úr Alþýðubandalagi Ólafs Ragnars og Svavars sem þar eyddu öllum tíma sínum og annarra flokksmanna í innbyrðis slagsmál, þá gekk ég í náðarfaðm Jóns Baldvins og Sighvatar. Þá var eitt helsta kosningamál Alþýðuflokksins í atvinnumálum að leggja sæstreng til Skotlands og hefja útflutning á raforku. Þessi stefna var klöstruð upp í iðnaðarráðuneytinu sem flokkurinn réði þá. Ég var var óðara munstraður í að skrifa greinar um rafstreng til útlanda, og halda um það ræður sem upphitari á fundum með Jóni Baldvin Nú telur Jón Baldvin að sæstrengur til útlanda stappi landráðum næst. En hugmyndin um hann var á sínum tíma unnin, þróuð og kynnt í boði þessa sama fyrrum leiðtoga lífs míns. Það er margt skrítið í vestfirska kýrhausnum…..“

Össur segir einnig að umræðan um orkupakkann sé í slæmum farvegi:

„Helstu rök andstæðinga orkupakkaræfilsins eru einkum að samþykkt hans feli í sér afsal fullveldis til yfirþjóðlegs valds. Sömuleiðis er staðhæft að hún leiði til að Íslendingar muni tapa yfirráðum yfir orkuauðlindinni. – Látum liggja milli hluta hvort þetta er rétt eða rangt. – Hin dulda fegurð í stöðunni felst í að auðvelt er að tryggja að hvorugt gerist. Það þarf ekki nema taka upp í stjórnarskrána sérstakt ákvæði um sameign þjóðarinnar á öllum auðlindum – og málið er dautt! Hversvegna förum við ekki þessa leið í staðinn fyrir að hálfdrepa hvert annað með egghvössum hnífilyrðum í hvert sinn sem málið ber á góma?“