WOW air skuldaði Isavia rúman milljarð króna undir lok júlímánaðar á síðasta ári, en í upphafi mánaðarins veitti stjórn Isavia forstjóranum heimild til tveggja milljarða lántöku. Er lánaheimildin nefnd rekstrarlánalína og/eða yfirdráttarlán í stjórnarsamþykktinni.

Viðskiptablaðið greinir frá þessu í ítarlegri úttekt á málefnum WOW og Isavia í dag.

Isavia gerði kröfu um að ein vél frá WOW yrði ávallt til staðar í Keflavík, sem veð, en Air Lease Corporation (ALC) sem á vélina sem um ræðir, hefur lagt fram aðfararbeiðni gegn Isavia og krefst þess að vélin verði afhent þeim tafarlaust. Verður málið flutt munnlega fyrir héraðsdómi Reykjaness í dag, en ágreiningsefnið er hvort heimilt sé að kyrrsetja eign þriðja aðila, sem tryggingu skuldar WOW gagnvart Isavia.

Í fundargerðum stjórnar Isavia kemur fram að fyrirtækið hafi ekki viljað verða þess valdandi að WOW færi á hausinn og taldi að ákvæði í lofferðalögum tryggði skuld WOW við Isavia.