Það verður að segjast eins og er, þetta er bráðskemmtileg ljósmynd. Þarna hittast tveir borgarstjórar í Reykjavík – sem báðir hafa að baki langa setu í embætti. Þeir eru ekki samherjar, ónei, og oft hafa kastast í kekki milli þeirra. En maður sér ekki betur á myndinni en að þarna séu fagnaðarfundir.

Myndin er tekin í gær á opnun sýningar á verkum Errós í Hafnarhúsinu. Ljósmyndarinn er Sigurður Bogi Sævarsson, blaðamaður á Morgunblaðinu. Ég birti hana með leyfi hans.

Nota svo tækifærið til að nefna að Sigurður Bogi er sérlega góð fyrirmynd í blaðamannastétt. Hann er ólatur að fara um borgina, út í plássin og um sveitir landsins, taka alls kyns fólk tali, mynda það og birta í blaðinu.  Þannig nær hann sambandi við fólkið í landinu  sem er bæði lofs- og öfundsvert. Hann er gamaldags blaðamaður – í góðum skilningi. Mættu fleiri fjölmiðlamenn gera þetta á tíma þegar alltof mikið af fréttum verða til í gegnum tölvupóst og samskiptamiðla.