„Þegar þú kaupir Ora grænar baunir styður þú hin ríku í stéttastríði sínu gegn almenningi.“
Svo segir í texta frá Gulu vestunum á Facebook, mótmælasamtökunum sem berjast gegn aukinni misskiptingu, láglaunastefnu, húsaleiguokri og lökum lífskjörum. Tilefnið er hækkun ÍsAm á vörum sínum í kjölfar samþykktra kjarasamninga, sem reitt hafa marga til reiði.
Í textanum á Facebook segir:
„Áður en Guðbjörg Matthíasdóttir, kvótaynja frá Vestmannaeyjum, keypti Ora fyrir fimm árum höfðu grænu baunirnar frá Ora verið táknmynd hins gamla góða á Íslandi, ómissandi hluti máltíða sem ætlað er að vera nostalgískar, notalegar, hlýjar og hjartagóðar. Með yfirlýsingu Isam, eignarhaldsfélagi Guðbjargar, í kjölfar kjarasamninga eru Ora grænar baunir orðnar að táknmynd óhefts græðgiskapítalisma, frekju hinna ríku sem heimta ávallt að fá sinn væna arð út úr rekstrinum og neita að borga starfsfólki sínu laun sem duga fyrir framfærslu. Þegar þú kaupir Ora grænar baunir styður þú hin ríku í stéttastríði sínu gegn almenningi.“
Stendur við orð sín
Hermann Stefánsson, forstjóri ÍSAM, sagði við Fréttablaðið í dag að fyrirtækið hygðist standa við boðaðar hækkanir á vörum sínum:
„Það hefur ekkert breyst þótt að samningarnir hafi verið samþykktir. Þetta var ekki hótun um það að það ætti að fella þá. Forsendur hafa ekki breyst við samþykkt samninganna.“
Hermann segir að verið sé að bregðast við auknum kostnaði og þessi leið sé farin í stað þess að fækka starfsfólki:
„Það er að hækka söluverðið eða hagræða. Hagræðingar enda á yfirleitt á einum stað, í fækkun starfsfólks og við höfum ekki viljað fara þá leið. Við erum búin að standa í miklum hagræðingaraðgerðum.“
Vörur frá Myllunni, Ora, Kexverksmiðjunni Frón og Kexverksmiðjunni, fyrirtækja í eigu ÍsAm, munu því hækka um 3,9 prósent á næstunni og allar innfluttar vörur fyrirtækisins um 1.9 prósent.